Се стабилизираат состојбите на македонскиот пазар на хартии од вредност. Неочекувано брзо берзата денеска одново е во позитива.
По вчерашниот историски рекорден пад на индексот МБИ 10 од 8,40%, денеска, цената на акциите на 10-те најликвидни компании порасна, индексот е во плус од 1,66%.
Вредноста на капиталот се зголеми и кај најголем дел од фирмите што не се во групата најликвидни, а се направи и промет од 795.000 евра.
Психолошкиот ефект од одбивањето на членството на Македонија во Нато полека спласнува, коментираат аналитичарите.
Од фирмите на официјалниот пазар најголем пад на вредноста на капиталот од 16% регистрираше „Охис“.
Во меѓувреме најави и за нови компании што ќе котираат на македонската берза. Најдоцна за месец дена својот капитал на продажба ќе го нуди британската информатичка фирма „I Develop“, која веќе подолго време работи во Македонија со софтверскиот производ наречен „Active reception“.
Менаџерите ги финишираат преговорите за да префрлат дел од своите акции на берзата и да им ги нудат за продажба на граѓаните и на фирмите.
„Ќе се лансираме на Македонската берза и ќе спроведеме јавна понуда на акциите за еден месец, ќе обезбедиме сигурен број на акции, мал број кој ќе дозволи компаниите од Македонија и граѓаните да купуваат акции од нашата компанија“, изјави Сајмон Бимиш, главен менаџер на „I Develop“.
Компанијата во наредниот период ќе се фокусира да ги исполни критериумите што ги бараат берзанските правила, за да може да котира на официјалниот пазар.
Home 
